O RÁNÁ VAI PARA O MAR

Como todos os anos, o RANA pasa pola penitencia do "carro". Este ano, leva varado dende o mes de febreiro na explanada dos Asteleiros Garrido do Grobe onde agarda entre rexas (imaxe 1), ata mañán a eso das dúas da tarde, a hora prevista para liberalo coa chegada da marea.

Se todo vai ben, mañán vai ao mar para terminar de aparellalo e o venres voltará de novo para Tragobe, este vez para quedar fondeado porque de momento non ten praza no pantalán.





Traballiños principais deste ano:

• Tratamento do forro interior
• Sentina (limpeza e imprimación)
• Cabina (2 capas pintura 2 compoñentes)
• Cuberta (2 capas esmalte)
• Eliminación varnices vellos lateral cabina e colocación do novo (6 máns)
• Eliminación e tratamento óxidación
• Varnices das tapas, tambuchos e tratamento panas 
• Selado desconchados no casco exterior
• Imprimación ( 2 capas autopulimentable)
• Pintura do casco
• Repintado da greca e pintar folio (todo a man) 

Un monte de horas e fins de semana, unha verdadeira penuria baixo o sol e o carallo do norte que non para de espallar pingueiras de pintura e amolarme coa cinta carroceira. Pero hoxe por fin dou por terminada a faena por este ano, polo menos no que atinxe ao mantemento do barco, porque a partir de agora, veñen outros problemas como é o do amarre ou convencer á Capitanía para que me den folio "daquí" dunha vez. Pero esa é outra historia, hoxe polo menos teño esa satisfacción que todos experimentades cando, despois de meses de lixa, rasca e pinta, ides devoltar o barco ao mar.

Así estaba fai apenas unha hora:

de costado

de proa

de popa

 
 

 

de cú

por baixo

e por riba

Moito traballiño, pero este ano polo menos contei coa axuda inestimable de Mauro:
 

 Remate: está claro que manter un barco ocupa moito tempo e supón un esforzo considerable pero tamén sabemos que nos dan certas alegrías e algunhas cousas que non se atopan en ningún otro sitio. Pero se cadra o que máis esgota é a deixadez e indiferencia xeralizada ante a perda de tanto patrimonio flotante, as veces por omisión, outras por malas accións..., sempre ese monte de papeleo e unha chea de burocracia de terra que marea.   En fin, a miña pena é non poder ir co RANA ao XI Encontro simplemente porque terei que agardar a que por fin me den o numeriño do folio "daqui", (de momento sigo con folio alemán) e terei que conformarme con mirar para él e contarlle mentiras, porque a ver como lle explico eu que para poder voltar a navegar precisa que o marquen outra vez como se fora unha res.

 
Pois nada, ánimo a todos os armadores que teimades en conservar un barco vello de madeira ( O RANA é un deseño de 1941 e construído no 1971) e que poidamos disfrutar no mar como un exercicio natural de liberdade. Vémonos no Freixo

A MULLER DE BALBOAS AO XI ENCONTRO

 

  

Como xa é sabido, este ano toca ENCONTRO DE EMBARCACIÓNS TRADICIONAIS DE GALICIA, tratase da XI edición, e a localidade de OUTES-FREIXO colle o relevo da vila de Carril que albergou o Encontro no ano 2011. Para este ano 2013, o Clube Mariño Salnés vai a participar coa dorna de tope "A Muller de Balboas" que xa está inscrita e representará ao Cambados mariñeiro polo menos no que atinxe ao CMS.

Esta é unha edición especial xa que a dorna cumple 50 anos e leva 10 anos en mans do CMS.  

  

A Muller de Balboas

 

No ano 2002, o CMS quería unha dorna de tope e atopou unha no Grobe. Daquela incorporaba motor intraborda e estaba acondicionada para a pesca con nasas e como tantas outras ía ser desguazada. Unha vez adquirida, levámola para Poio, onde un ano antes encargáramos a construcción da dorna de escarba "Julicheira" a Isidro Mariño e a Paco "Paxaro". 

Para a recuperación da dorna de tope, voltamos a confiar nas mesmas persoas e ademáis incorporouse Valentin Pérez Gonzalez, o derradeiro carpinteiro de ribeira de Combarro.

Unha vez rematado o traballo de restauración, a antiga carpintería, situada na ribeira perto do bar "Aquí te espero", pechaba pola xubilación do mestre. 

Pouco máis tarde, unha nova edificación borraba para sempre o son dos martelos, as aixolas e os cepillos na beira mar de Combarro.

A Muller de Balboas na carpintería de Valentín:

colocación da cuberta e fogonadura               dereita: novo espello               

Valentin e Isidro Mariño

 Caracteristicas da dorna unha vez restaurada

Eslora: 5,40m

Manga: 1,90m

Aparello: vela de relinga (realización: Julio Pousa e Ramont Albert)

No ano 2003 botámola ao mar coincidindo co Encontro de Embarcacións da Illa de Arousa, e dende aquela, A Muller de Balboas ten asistido a todos os Encontros, (con excepción de Ferrol 2009):

 Carril 2011:

Muros 2009:

A muller de Balboas a carón do RANA

 Case todos os anos, coincidindo co remate dos taballos de mantemento, facémoslle unha festiña na sede do CMS, na escalitana de San Tomé:

 

   

 

Fronte a escalinata. 2012

Restauración no garaxe de Bruno. 2011

Esta ano lucía así de bonita na rampla de San Tomé:

Pero a Muller de Balboas non só asiste puntualmente ás citas de cultura marítima galegas, tamén ten viaxado fora, como no ano 2004 na cita de Douarnenez:

Féttes Marítimes de Douarnenez. 2004

E son moitas as persoas que teñen navegado con nós, a veces en actividades de escola e outras simplemente por dar unha volta:

entrando no Grobe

Carreirón. Illa de Arousa. Verán 2010

 
Moitos tardes de navegación, incontables bordos, horas e horas disfrutando e compartindo experiencias, risas...

De Vilaxoán a Cambados. 2009

 

Cubeiro, Nando, Oscar e Delia. Volta do Carreirón. 2009

Camiño do Grobe para a botadura dos galeóns de Sanxenxo. 2003

  

Dez anos coa Muller de Balboas, unha dorna que navega de maravilla e coa que temos vivido tantas aventuras e anécdotas..., tantas caras, tanta xente a bordo que seguro lembrarán con agarimo as saídas de navegación cos membros do CMS, poucos pero con moito mérito, penso eu, por ter bogado tantas veces a contacorrente. Pero ahí seguimos e gardo que a cousa dure e a Muller de Balboas que o vexa.

Remate:

Este ano, o CMS vai ao Encontro tan só coa Muller de Balboas, en terra van quedar seguramente a Julicheira e o RANA, outra vez será, pero aínda así, coido que estaremos perfectamente representados con esta dorna que é sen dúbida o barco enseña da Asociación. Seguro que hai fotos moito mellores, pero eu só teño éstas, agardo que vos gusten. 

Vémonos no Freixo-Outes 2013.

Mercado Mariñeiro Medieval

cartel

Esta fin de semana, dende a Web "Vivir Cambados", anunciaban a celebración dun Mercado Mariñeiro Medieval organizado polo propio Concello e o Grupo de Acción Costeira da Ría de Arousa. No cartel promocional do evento pódese leer na parte superior dereita o eslogan COME O MAR e entre os obxectivos pretendidos enuncianse os seguintes: 

• promocionar os productos do mar
• promocionar a gastronomía e a artesanía da costa galega
• difundir a cultura mariñeira dunha vila que se carracterizou por vivir aberta ao mar.

Imaxen capturada da Web "Vivir Cambados"

Pronto a prensa reflectíu o evento con mensaxes coma estas:

Faro de Vigo:

                                                    La carne asada es el producto estrella

No texto pódese leer: "y su finalidad es promocionar el turismo y la gastronomía del mar. Hay puestos de embutidos y carne, productos de artesanía como piezas de madera y jabones aromáticos, de bisutería...", e ilustra a nova coa foto dunha gran parrillada acompañada da lenda "La carne asada es el producto estrella"

Aparece outra foto onde nos anuncian que tamén se "despachan bebidas exóticas y tropicales"  

 La Voz de Galicia:

De igual xeito, recollen a toda páxina que "Cambados se suma a la moda de los mercados medievales" e o obxectivo da iniciativa é "promocionar la cultura marinera".
 

 

Grupos de Acción Costeira:

Nesta "iniciativa", participa o GAC da Ría de Arousa, o cal intégrase nos Grupos de Acción Costeira que é un programa financiado pola Unión Europea a través do Fondo Europea do Pesca que pretende "investir na pesca sustentable". Un programa que entre outros, ten como obxectivos principais os seguintes:

"Un dos obxectivos prioritarios do Eixe 4 é mellorar o traballo no sector pesqueiro, incentivando a diversificación económica, reorientando os investimentos cara ao sector turístico-pesqueiro, cultural, ambiental, etc.

O obxectivo será manter a poboación nestas rexións (fomentando a substitución xeracional) e lograr con iso a sostibilidade económica a longo prazo. A diversificación económica permitirá mellorar as taxas de crecemento económico e emprego destas zonas e aumentará a capacidade de elección dos traballadores á hora de buscar novas fontes de ingresos".

A REALIDADE:

Hoxe achegeime a contemplar esta "iniciativa" que pretendía fomentar a cultura mariñeira, poñer en valor os productos e a gastronomía local, diversificar o sector do mar, promocionar un turismo mariñeiro e dar a coñecer ao visitante unha aposta pola pesca sustentable e artesanal, poñendo en valor a cultura da franxa costeira galega. Pois ben, esto é o que me atopei:

Nota: As fotos foron quitadas co mobil e estan por orden do que aparece na feira:

1º Tenderete:

2º Tenderete:

3º Tenderete:

4º Tenderete

5º Tenderete:

 6º tenderete:

7º Tenderete:

Nota: o único viño presente na feira era de Rioja.

8º Tenderete:

 9º Tenderete:

10º Tenderete:

11º Tenderete:

12 Tenderete:

13º Tenderete:  (queixos de cabra de Cáceres)

14º Tenderete:

15º Tenderete:

16º Tenderete:

"baba de caracol"

Ao final aparece unha bruxa que nos anima a sonreir:

É máis nada, nin un triste birbiricho ou unha lata de alquicres, nen tan sequera un aparello de pesca por aquelo de pescar incautos..., nada, nin ratro de mar nin de peixe, ni de marisco, nin de barcos, nin nada de nada. Unha festa mariñeira sen mariñeiros nin mariscadoras, onde tan só pululaban pola Praza unhas rapaciñas disfrazadas de mariñeiriñas, con puchos brancos cunha áncora debuxada, camiseta con franzas azuis, flotadores con cabeza de parrulo na cintura e unhas gafas de buceo con tubo colocadas na fronte.

Por moito que a bruxa nos diga que temos que "sonreir", a min no me fixo ninhunha gracia, supoño que a maioría dos cambadeses tampouco, e imaxino a indignación que sentirán os homes e mulleres do sector do mar de Cambados, incluíndo aquí ás entidades de cultura marítima. Unha tomadura de pelo ao bestia, unha burla para tod@s, un despilfarro indecente e unha vergoña para a vila de Cambados. Lembro o obxectivo enunciado polas autoridades responsables: "o obxectivo non é outro que amosar ao visitante o xeito de vida en toda a franxa costeira de Galicia". Eu como cambadés quero pedirlle desculpas a todos os que nos visitaron esta fin de semana e tiveron a desgracia de achegarse ata ese Esperpento. Tentarei na medida das posibilidades deste blog, reparar o agravio e facer unha entrada onde se amose o cambades mariñeiro de verdade, o que por lóxica e dereito tería que estar representado.  

Falando cun artesan que facía roupa con pelo de cabalo, dixome que esta tenderetada a montaba unha empresa que cobraba 50.000€ pola montaxe. De ser certo, estaríamos a falar de cartos que veñen do Fondo Europeo da Pesca para os obxectivos que se enumeran máis arriba. A estes gastos habería que imputar todos os custes correspondentes cos comisarios da pesca, eurodiputados do Fondo Europeo de Pesca, directores xerais cos seus asesores da Consellería de Pesca, Centros Tecnolóxicos como o CETMAR que coordinan os Grupos de Acción Costeira, a organización mesma dos distintos grupos de acción costeira (sete en Galicia cos seus respectivos xerentes e persoal administrativo), reunións, desprazamentos, dietas, etc.

En fin, se esto é como se xestiona Europa está claro que a nave europea vai a pique seguro. Despois desto, penso que xa non queda outro calificativo para reflectir a indignación máis que a palabra NOXO.  

Remate:

Señores eurodiputados, xestores e políticos en xeral, ou cambiamos a maneira de facer Europa, ou o vello continente vaise convertir nunha Gran Choqueirada onde a dignidade dos pobos se vende a prezo de saldo en calquera tenderete feiral..., "medieval y marinero", eso sí.