Exposición A Memoria do Mar

Onte presentouse o traballo feito pola equipo do Museo do Mar de dixitalización de fotografía antiga do mar e vilas costeiras, un proxecto que vai contribuir a ter un importante arquivo de imaxes e documentación asociada as mesmas. A vila de Cambados tamén está neste arquivo, e a web feita para este traballo publica unhas fotos de Cambados (sinceiramente penso que hainas moito mellores e representativas) con algúns erros que bou comentar para que se poidan corrixir, xa que non imos cambiar agora á vista de tanta xente o que durante tantos anos conservaron esas fotos na intimidade.

1ª corrección: Mariñeiros no Pósito de Cambados

Esta foto en efecto poden ser mariñeiros de Cambados, non discuto, pero dende logo non é o Pósito, esto é a casa dos Pomares-Zárate na praza de Alfredo Brañas (por certo, fundador do Pósito de Cambados no 1912 o primeiro en España). É unha das poucas edificacións de estilo modernista que queda en Cambados. O que se ve na foto é a entrada principal cos azulexos nas paredes e aquí é onde estaba a consulta do médico Eulogio Pomares. Eu papaei moitos xiringazos nesa mesma consulta e lembro aqueles azulexos un por un porque os contaba sentado no banquiño de madeira dese recibidor que facía as veces de sala de espera. A casa aínda existe, está restaurada e o único que cambiou foi a cor da pintura da fachada principal que antes era en tonos grises e agora en tonos verdosos. O máis probable é que estes homes estiveran agardando turno de consulta, e os nenos idem, simplemente vese que van vestidos "pra ir o médico".

2ª corrección: Redeiras no peirao de Cambados

Estas son redeiras de Cambados pero o porto é o de San Tomé. Do muelle de Cambados vese o arranque do espigón á esquerda da foto.

3ª corrección: Procesión do Carmen de Cambados

Esta foto ilústrase do seguinte xeito: "Vista xeral dun cerqueiro na procesión da Virxe do Carme de Cambados".
Home, as mulleres do mar de Cambados teñen sona de ser fortes e ajerridas, pero chamarlles "cerqueiros" xa me parece excesivo.

Por último: Dornas amarradas en Cambados

Desta foto se dí se ven "dornas" amarradas. Non discuto que a primeira desas embarcacións sexa unha dorna, que as había, sobre todo "mecas" e "de tope". Pero a segunda dende logo é unha gamela, porque a gamela é a embarcación por excelencia de Cambados. Aparellaban en latina e se empregaban para ir ó raño, á liña e para as artes menores (xeitos, tramallos, ...etc), e esto era así porque Cambados está no fondo da Ría, e a gamela plan e de pouco calado, facilitaba a súa varada e navegación polas augas de escasa fondura. E digo esto para que non se distorsione á realidade, historia e ideosincracia, singularidade e particularidade e todo o que se queira de cada vila, porque se non, cando vexamos fotos antigas, nos poñeran a dun "Macdonas" deses e dirán que daquela o que máis se comía na costa eran hamburguesas.

Bueno, aos que a fixeron simplemente lles deixo estas aclaracións por si lles vale de algo. Noraboa polo traballo e as fotos pódense ver en:
http://memoria.museodomar.com

Fochochó: 3ª entrrega

Do taller de tuneado boudevara_fochochó, recen saído do forno quenturento dos miolos de Lino Prieto, manilupador, tranquillante e raposeiro, aquí vai a 3ª entrega da serie Piratas do Calime:

Título: Marajota e media

Fochochó: Lino Prieto

Ben, agardamos que vos guste, a dende aquí vos seguimos a animar a presentar unha montaxe ou ben unha foto para traballar no taller de tuneado. Lembro enderezos:
linoprieto@gmail.com
xaquin@beiradomar.es

O MELLOR DAS NOSAS RÍAS E DA NOSA PESCA

o mellor do mar:

Nestas datas de tanto papar, non vos esquencer de mercar os nosos mellores productos do mar, ós mariñeiros e mariscadoras que saen ó mar e van á seca todolos días confían en nós, e nos neles. Aquí van algúns dos mellores:

VIEIRA DE CAMBADOS

Mariñeiro de Cambados na Campaña da Vieira. Porto de Tragobe.
Foto: Boudevara

O Luns abriu a campaña da vieira, e hoxe coñecemos que a Confradía de Cambados e maila empresa comercializadora comezaron a vender ó público os primeiros lotes de vieira fresca despois de ser depurada, eviscerada e envasada ó baleiro.

Precisamente para esto, a Confraría abrirá mañá un posto de venta directa de vieira fresca na lonxa de Tragove, de modo que as persoas interesadas tan só terán que dirixirse á persoa responsable para adquirilas por caixas de 25 unidades, que se venderán a un prezo de 50 euros (aprox), xa que varia en función do tamaño das pezas (tfono información Confraría de Cambados: 986 542056)

Tamén, dende o sector agardan que a partir de hoxe se poda atopar vieira fresca de Cambados nas principais superficies comerciais (atentos ó etiquetaxe, data de envasado e orixe).

Pranta de eviscarado. Porto de Tragobe. Cambados

foto: boudeva

Cantidades de captura: os 28 barcos que onte participaron no segundo día da campaña, descargaron no porto de Tragove perto de tres toneladas.

MERLUZA DE CELEIRO

Barco Museo. Reina del Carmen. Burela.
Foto: Fundación Expomar

A Merluza de Celeiro, é un producto de primeira calidade e delicado sabor que ben de colleitar un gran éxito gastronómico da man do cociñeiro compostelán Marcelo Tejedor (integrado no Grupo NOVE), que quedou clasificado na cuarta posición na lista dos mellores pratos de España seleccionados pola revista especializada: Vino+Gastronomía.

A receita: A base é a merluza pescada polos barcos de Celeiro, acompañada dun caldo de pementos verdes e un pilpil de limón.

A merluza de Celeiro, capturada “ó pincho”, ten acadado nome propio en todo o territorio nacional, ónde cociñeiros da elite gastronómica do país a empregan nas súas preparacións.

Exemplos:

Xavier Rodríguez (coruñés), premio nacional de restauración na Feira Mundial da Pesca de Vigo, cos pratos: merluza con tomate confitado e oliva negra, cullerada de merluza á galega, tacos de merluza en tempura e ali oli de herbas e tartar de merluza con ovas de troita.

A merluza de Celeiro tamén se ten promocionado en Londres, París, ou en Madrid coas ovas de merluza no Salón Internacional do Gourmet de Madrid.

PERCEBE DAS RÍAS BAIXAS

Para o percebe autóctono da costa guardesa, as novas non son tan boas, pero tampouco tan malas. Por unha banda as mareas prohiben a súa extracción nestas datas e como é un producto que non admite conxelación non poderedes degustala na cea de Noiteboa, pero si o percebe da nosa costa situadas máis ao Norte. Máis a boa nova é que se pode degustar ate o próximo día 19 deste mes, data na que termina a marea e poderán volver a facelo a partires do 26 de decembro, data na que se reinicia a extracción.

Con todo, o pasado mércores 10 decembro tivemos a ocasión de coñecer dentro do Seminario “A Gastronomía como valor engadido do turismo mariñeiro en Galicia”, organizado polo Cetmar de Vigo, unha nova actuación con este producto, paté de percebe, un proxecto que desenvolven as Confraría de Baiona, A Garda e Bueu e que pronto teremos nas tendas especializadas.

Susana Gonzalez. Presidenta Agrupación Percebeir@s da Confraría de Baiona
Cetmar. Vigo. Presentación decembro 2008

Outro día falamos das volandeiras, dos ourizos, das algas ou das anémonas,.......

Bendito VENRES: Campaña da Vieira

Descarga da vieira. Porto de Tragobe.
Cambados 2007. Foto: Boudevara

Hoxe venres coñecemos a boa nova da apertura da campaña da vieira así que a partires do vindeiro luns, tanto a flota da vieira de Cambados como a de Rianxo poderán coller este marisco nas augas da Ría de Arousa. Esto foi confirmado onte mesmo pechándose así un longo camiño de negociacións para iniciar a extracción antes do Nadal.

A campaña arrancará cos topes establecidos de 30 kilos de producto por tripulante, ate un máximo de 90 por barco, “despois irase vendo a posibilidade de ir cambiando os cupos, dependendo das necesidades”, declararon os patrón maiores das Confrarías de Cambados e Rianxo.

O prezo acordado coa empresa que se encargará do eviscerado é de 3,7 euros o Kgr.

Así que todos aqueles que veñades por Cambados pasádevos polo porto de Tragobe, porque dende a punta mesmo do espigón, a partir das 9 da mañán, empezan a facer os lances, e sobre as 12 h, van voltando os barcos para a descarga, todo un espectáculo que podedes seguir dende o peirao.

Os máis curiosos tamén podedes visitar en Tragobe a planta de eviscerado, de momento a única autorizada pola Xunta.

E para degustalas, xa vos dixen noutra entrada que están formidables no restaurante O Solar, pero tamén noutros coma O Ribadomar, Posta do Sol, A Traíña, Yayo Daporta, Pandemonium, …., e as volandeiras en Casa Pintos de San Tomé están que se saen. Eso si, todo acompañado cun bo Alvariño.

E agora toca elexir pesoeiro

PERSOEIRO DA SEMANA

Onte mesmo falamos neste blog do Pavillón da Onda do Encontro de Cambados-2005, e dunha dorniña que alí estivo exposta agardando que a divina providencia dictaminase pola vía da sorte e do sorteo o seu lexítimo dono. ¿E a quen lle foi a tocare?.

O sábado noite, pola megafonía do escenario da Carpa da Taberna Mariñeira situada no Illote da”Cartuxa” anunciouse que ía dar comezo o sorteo, eu andaba apoiado na barra da Taberna sen prestar moita atención, porque o cansazo estaba a facerse notar. Me acompañaba a despistada Koki, da Asoc. Amigos da dorna de Portonovo, apurando unhas cañas. Cando anunciaron o número premiado, comenteille se tiña rifas e me dixo que creía que si. Meteu a man no blosillo e mirou a rifa, “Ostias, tocounos a dorna”, dixo. ¿Estas segura?, ¡mira que van pensar que che din eu a rifa premiada!.

Koki saíu correndo para buscar á xente da súa Asociación, e ó primeiro que atopou foi a Pelouro, que nada máis enterarse exclamou: VAIA BICOCA.

Botadura da Bicoca. Portonovo 2006

Persoeiro da semana: Pelouro, tamén coñecido como Nardo.

PELOURO

Pelouro nada máis coñecer a sorte da rifa.

Taberna Mariñeira Encontro Cambados 2005
Foto: Lino Prieto

Pelouro é o responsable de que os Amigos de Portonovo usen o alquitrén para tratar os barcos e non laca de uñas, “aseitiño, aseditiño”, é o mellor. Tamén é o responsable de que as tripulación de Portonovo non se extravíen nas navegacións nocturnas polos seus profundos coñecementos das estrelas e constelacións. Neste senso sábese do seu romance con Casiopea e Melopea. E tamén é o cerebro organizador das cuestións que esixen coñecementos técnicos de loxística, alta tecnoloxía e motorización.

Aquí o tedes dirixindo unha delicada e complicada operación de traslado de embarcacións.

E por suposto é o responsable de que as tripas do Platuxa estén sempre quentiñas e dispostas para funcionar. “aseitiño, aseitiño”.

Platuxa. Foto: dornaportonovoblog

E como todo bo navegante ten o seu barco, a dorna Paxara, que pecorre puntualmente todos os anos, como ofrecemento en procesión de Semana Santa a travesía Portonovo-Combarro. As malas lingoas din que tamén é a única vez que a pobre dorna navega, pero coñecendo o sentido místico de Pelouro algunha razón de fondo terá.

Compañeiriño, que sería deses barquiños sen ti, sen a túa man experta mimadora de madeiras e motores, de día e de noite sempre esperto, alerta, iluminándonos co teu facho de sabiduría, ..., como Casiopea.

Para finalizar, unha foto do ano 2007, levando a Jatinha polo Lerez arriba na Feira Franca de Pontevedra:

KoKi, Monica e máis eu. A bordo tamén ían Santi e como non Anxo

fotos en: http://www.flickr.com/photos/25207546@N03/

SEJIMOS

Lancha poveira amarrada en San Tomé. VII Encontro-Cambados 2005

Ben, queridos amig@s, antes de nada decirvos que esta nave blog topou na súa singradura cunha encalmada non prevista e as velas andiveron a parvear e como non había janinhas de vogar nin de couse nin de meo, pois ala, a agardar polos ventos portantes, que nunca choveu que non escampara e nunca se veu néboa que non disipara. Esta mañanciña asubiou unha airesiña que se colou polas canles e fíos da intérnete e así decidimos levar ancoras e comezar a andar, que a marea tamén xa corre a favor.

Así que hoxe poñemos rumbo cara a Cambados 2005 fasendo parada no taller do fochochó a ver se temos algo.

10 anos do Clube Mariño Salnés: Encontro Cambados 2005

2ª entrega:Foi tanto mundo de “dos” aquel encontro que ben merece que esta semana continuemos con el. Como eu apenas teño fotos pedíanlle a Lino que dera algunha máis que son as que imos ver. (nota: podedes poñervos en contacto con Lino se vos interesa ver a reportaxe que fixo do Encontro e que podedes encargar en distintos tamaños e formatos. linoprieto@gmail.com)

Tamén, a semana pasada pasei pola tenda “foto luz” de Cambados (na praza de Alfredo Brañas) e como sabía que fixera unha reportaxe do Encontro pedinlle que más ensinara. Ten un mundo delas, mireinas no ordenador da tenda e a maioría son espectaculares (quitadas con equipos profesionais claro). Eu xa lle encarguei algunhas en tamaño grande para regalar e outras para enmarcar para min, pero pasarei doutra volta a seleccionar máis. Se alguén está interesado alí está o home para atender encantado, vale a pena, algunhas son moi boas e ten de todo.

"lancha de jábega" de Málaga

Foto: Pavillón na Onda:

Dentro deste Pavillón amosábanse as iniciativas empresariais relacionadas coa conservación do patrimonio marítimo e fomento da cultura marítima (o mesmo que a Federación pero dende outras ópticas xurídicas). Alí estaban por exemplo as mariscadoras de Guimatur, Intramar S.L, Vapores del Atlántico, Fundación Expomar, proxecto Mar de Lira, delegación Douarnenez 2006, Ponte nas Ondas coa súa candidatura. Tamén estaba exposta a dorna que se ía sortear o domingo e mesmo tamén a “librería do Mar”, onde ademais de libros de temática cultural do mar, se realizaban presentacións de libros, revistas, etc. Alí se presentou por exemplo o libro “Homes de ferro en barcos de madeira”.

Nesta foto vemos unha presentación dun poemario do noso gran amigo “Alexandre Nerium” que coñecemos nos tempos do Batallón Literario de Fisterra. Entablei contacto con Manolo a través dun vello e gran amigo común, o poeta Estevo Creus, tamén da costa da Morte que foi quen nos puxo en contacto nun recital de poesía celebrado en Caldas de Reis nese mesmo ano. Tanto Manolo como Modesto Fraga encargáronse de traer a Cambados boa parte dos integrantes do batallón literario a Cambados naquela primixenia exposición que fixo o Clube Mariño Salnés no ano 1998. Naquel recital tamén estaban Tabullo, Bernardino Graña ou Chus Nogueira. Foi un recital de poesía musicada, por Raño, Josito Bahamonde e máis eu. Agora volto ter contacto con Alexandre xa que está contratado no Museo de Pesca, situado no Castelo de San Carlos, batería defensiva do século XVIII e adscrito o proxecto de Turismo Mariñeiro “Fisterra pescando onde o solpor”.

bote tradicional da vila do Cristo con peza do xeito antiga de algodón.

Museo do Mar de Fisterra

foto: moliçeiro

A seguinte foto é a dun Moliçeiro tipo alien “Yamaha”, e destes non falo porque en dornablog tedes un magnífico reportaxe.

http://fungona.blogspot.com/

foto: regata de dornas do albariño

E esta foto corresponde cos regata do Albariño, que ese ano fundiuse dentro da programación de actividades do Encontro, con todo esta supoñía xa a sexta ou sétima edición?. Parecía que nacera onte pero aquí estaba está regata de dornas consolidándose no panorama galego como cita clásica.

Ben, por hoxe chega, de todas formas voulle pedir ó fotografo oficial de boudevablog se ten fotos da taberna mariñeira (Quico Cadaval, A Viñalar Fantastic Band, as cantigas tabernarias,....) ou das moitas actuacións (MiIlladoiro, Malvela, Nova Galega de Danza, Trebón, .....).

Anécdota: na presentación onde está Dionisio, Fernandez Rei e compañía (non sei o nome de todos), vese unha vela de fondo,.... é a do “Ella”. Lembrades ese barco?. O único que queda del son os paus e botavaras, reconvertidos en columnas de “pórche” e tiro de escaleira caracol de pasamáns. Noutra ocasión vos enseño fotos.

Vos deixo un enlace curioso en “yotube” onde uns espontáneos invaden o campo de navegación metidos nunha bañeira pintada de marrón escuro. Hai amores que matan:

http://video.google.com/videoplay?docid=-1365121978636274071

Taller de tuneado Boudevara-Fochochó

Despois de dúas semanas de duros traballos de tuneado, aquí vai a segunda entrega de Piratas do Calime. A ver se vos gusta.

Título: Así jañou Muros, así

Personaxe: Moncho Bouzas

Foto orixinal: Toño Mosquera

Fochochó: Lino Prieto

Nota: O autor da foto é Toño Mosquera (tripulante da Canoa da Esteirana) e foi sacada durante a celebración da Regata de Gamelas no campo de regatas da Praia de Parameán na Vila de Esteiro.

Veña, agardamos as vosas montaxes ou fotos orixinais no taller de fochochó. Lembrade poñer o titulo da foto orixinal, o personaxe, título e notas se cadra

linoprieto@gmail.com

xaquin@beiradomar.es

ANO 2005: 10 Aniversario do Clube Mariño Salnés

Ano 2005: Foi o ano do VII Encontro de embarcacións tradicionais de Galicia.Cambados 2005, así que non ai moito máis que contar, se cadra que a xente do CMS andou tamén centrada ese ano preparando a sede da Federación, un local cedido vía convenio pola Confraría de Pescadores de Cambados e que serviría tamén de oficina e local de referencia para a Comisión Organizadora do Encontro Cambados 2005.
A partir dese momento as Asembleas xa se van a celebrar aquí, substituíndo á Casa da Cultura de Cambados que viña exercendo de sede oficial.

Penso que foron uns grandes encontros que marcaron o guión dos Encontros do futuro, e a Comisión Organizadora funcionou coma unha piña. Como as imaxes valen máis que mil palabras aí van unhas fotos do fotógraso ofisial Lino Prieto

Saíndo ó mar entre o muelle de Cambados e o de Santomé. En imaxe a dorna de tope cambadesa Airexa. A pé de foto o trincado ferrolán bedoiano Ría de Ferrol.

Esta foto me gusta, me gusta moito. Pantalán co bote de cesantes "Burbida" en primeira plana. Saúdos a "Juanito", presente en todos os encontros dende a primeira edición ate a última en Ferrol. E sempre chegou navegandó.

Por aí tamén se ve a Belida, o racú a Oleira,.......

Por aquí gamela coruxeira, a Rabandeira de Vilanova e A Nova Jorita de Cambados

.O Mediterraneo convidado de honra.

muleta "Dunia"

Portugal estivo ben representado coa "Fe en Deus", a "Bosa Sr. dos Anjos", o Moliçeiro ou a "Nsa. Sr. da Agonía"

Os vascos de Albaola que marcharon bogando igual que os irlandeses,

A flota meca presentou o dornón " A Irmandiña", ían pra América pero desidiron non ir que alí os centolos dis que están cativos.

Foron uns encontros de moita programación cultural, e especialmente bonito foi a recreación da descarga e lañado do peixe polas peixeiras no lavadeiro do muelle de Cambados, cos xeiteira traendo o peixe a terra, nas patelas, que foron feitas expecialmente para a ocasión por Toño, o noso cesteiro

Toño o cesteiro no Pavillón dos artesáns

O ultimo día do Encontro de Cambados, Xabi Argote solicita unha reunión para tratar o proxecto I Encontro Vasco-Galego a celebrar en Pasaia. Alí fumos unha boa representación da FGCMF.

Dorna de Tope da Illa de Arousa: Parada, Pimón, Melquiades,eu e duas rapazas de Albaola. Pasaia 2005

No mes de novembro asisto á Casa Mariñeira da Pobra do Caramiñal para falar na mostra “O Mar, o Barco e Máis Nós”, e como dixo Oswaldo no blog de Sodináutica "También fué el último acto público del presidente saliente de la Federación Galega pola Cultura Marítima e Fluvial”. (Jústame eso de saliente). Aínda que esto non foi de todo certo xa que nesas datas tamén asistin a unha reunión no Museo do Mar de Vigo, con Pablo Carrera, Dionisio e representantes da organización de Brest, o cometido era comprobar a dispoñibilidade e capacidade para que Galicia esté presente en Bret 2008 como convidada de honra, pero eso xa é outra historia.

No mes decembro dese ano deixo a Federación e a partir de aquí xa non me corresponde a min falar dela, así que a vindeira entrega correspondente o ano 2006 estará centrada no Clube Mariño Salnés. Simplemente dicir que no primeiro mes do ano 2006, outro cambades e membro do CMS accede á presidencia da FGCMF, Fernando Piñeiro, o actual presidente.

Cousas curiosas dese ano:

Pardavila estrea dorna, "A BAzarra", e a leva con orgullo ó Pais Vasco, a súa outra patria.

Aquí os andan: Pardavila, Calviño e o mestre Camba.



E antes de que se fixera oficial o cartel de Cambados, un xoven rapas, meco por máis señas, manda a Federación unha proposta:


¿Que che parece Lino?

PIRATAS DO CALIME

A semana estivemos a falar moito de pitatas. Lino, experto manilupador de textos, imaxes e santas devocións, envía a primeira entrega desta serie de "Pitatas do Calime na procura do Teodoro de Malpica", que ven a ser unha serie de fotos de homens e mulleres da bichicomada de los barcos viejos de madera transformados polo fochochó.

Animádeos e a ver que sae daquí. As fotos as podedes mandar á:

xaquin@beiradomar.es ou ben a linoprieto@gmail.com

1ª entrega:
Capitán Caramechas
foto orixinal: F.Fdez. Rei
fochochó: Lino Prieto

NOTA:
1. se non tendes fochochó, tamén podedes mandar unha foto e nos a manipulamos no taller de tuneado boudevarafochochó.
2. Podedes puntuar as montaxes nunha escala de 1 a 5 puntos, así podemos elixir a mellor fochochada do mes.

Chegou San Venres

Carteis: Ribeira 1993 - Muros 2009

Ben, xa vexo que estades un pouco retraídos con esto da critica de arte.

A min o cartel gustoume sobre todo pola diferencia co cartel do ano 93, un cartel moi significativo e xa mítico, en branco e negro (etnografía) e o neno coa maqueta da dorna “Javiota”. A dorna rematada por Juan Servando en Brest foi bautizada co mesmo nome. Pola contra este é unha pintura, con forza de cores, moi vitalista e chamativo. A min gústanme particularmente os carteis pintados fronte a fotografía. Son dous conceptos moi distintos que sempre se presentan cando toca elixir. En Combarro por exemplo a metade quería unha foto antiga dun galeón de Combarro por aquelo do valor histórico, e outros algo máis moderno e chamativo argumentando o papel reclamo dun cartel. Nesa ocasión se fixeron dous, a foto para o Encontro, e o “artístico” para a Festa do Mar.

Botadura da dorna "Javiota. Bret 08. Foto Dornablog

Nalgunhas exposición que se teñen feito sobre carteis de Regatas e Encontros puidemos comprobar o gusto dos galegos pola fotografía fronte a artistada. Moi distinto dos Bretóns, por exemplo, que normalmente acoden ó óleo. Na I Xuntanza de Embarcacións Tradicionais de Cambados presentamos como cartel un óleo (obra miña) e a xente gustoulle moito, poucas ocasión máis tivemos para ver un cadro de cartel. No Encontro de Cambados 2005 tamén collemos un óleo de San Tomé, pintado en 1912 por Bríxida Leiro (polo apelido xa vos imaxinades de quen é familiar).

Agora Muros semella facer unha aposta por converter a cita 09 nunha data mítica, con pintura rupestre de novo século, expresiva e colorista. Fecunda. (V)

Persoeiro da semana: Esta semana non puxen ningunha nova (agás o cartel de Muros) porque quería manter a relevancia daquel Novembro do 2002 que tivo tantas imaxes para tantos titulares. Para este blog escollín a do Capitán Mangouras. Para elixir persoeiro desta semana consultei co capitán, e falando e falando coincidimos na admiración e fascinación por un gran persoeiro do mar:

O Capitán Kid

Persoeiro da semana: Capitan Kid

Corsario KID

O Capitán Kid foi tratado pola historia coma un pirata. Foi executado como tal e penduraron os seus restos nunha gaiola ós pés do Támesis para escarnio e advertencia. Kid era un corsario, e foi capitán do Adventure Gallei, un impresionante barco de guerra da época, co cometido de “cazar” piratas que amenazaban ó trafico de mercadorías da potente Compañía das Indias Orientais. Finalmente, viuse atrapado entre unha maraña de intereses e traicións. Entre as oscuras ambicións de monarquía inglesa, os gordos usureiros e os especuladores sen escrúpulos acabaron con el, e o condenaron como chibo espiatorio para tapar as miserables mentes dos que o condenaron.

Recomendo este libro “El Cazador de Piratas” de Richard Zacks” que penso fai xustiza non so a Kid, senón tamén a aquelas persoas do mar que se ven presas das miserables ambicións terrais.

Se Mangouras é Kid son piratas, entón eu tamén:

Lancha Xeiteira "Nova Marina". Douarnenez 2004

presentación cartel Muros 2009

Cartel IX ENCONTRO DE EMBARCACIÓNS TRADICIONAIS DE GALICIA
Muros 2009

Estes días presentouse o cartel de Muros 2009 no Salón Náutico de Barcelona. Que vos parece?

aniversario do Pretige

Capitán Apostolos Mangouras

Nunca mais un capitán preso pola incompetencia política

seguimos: 10 anos do Clube Mariño Salnés

ano 2004. Un ano de luces e moitas sombras para o CMS

A semana pasada quedei na botadura do Galeón “Nuevo Sofía” que non puido estar rematada a tempo para os encontros da Illa. Poucos días despois formaba novo equipo para dirixir a FGCMF, imos por partes: