Translate

viernes, 18 de octubre de 2019

Mar en calma

 
Imaxe: Hadriana Ordoñez Otero



                                                                                                    Mar en Calma



 
Extensión chaira,
quilométrica chumbada de pousos esquiva
sen rastro de marca, sen risco
solitaria de sons ausentes.


 
Quietude presa,
faciana queda reflectida nun espello de acougos
sen rastro de vento, sen trazo
marabillosa de sosego quedo.


Cafurna de ansiedades,
berro afogado nun solpor de roseiras enxoitas
sen corcheas de bruar, sen voz
xemido lene que se pousa nun suspiro.



Proxección de silencios,
calado compás de rumbos falsos
sen norte claro, sen derrota
traxectos borrados nas follas planas da bitácora.



Horizonte de asexos,
ollos sepultados na marea ingrávida,
sen forza para nada, sen alma
só divagacións xordas dun navío transparente. 




                                                    
                                                        Exidio Cuíñas
                                                                        outubro 2019©





  

 Agradecementos a: 
Hadriana Ordoñez Otero
                       imaxes